Anëtarja e KB: Çmimi i ujit të pijshëm në Shkodër do të rritet

Nga Eliona Kodra Shkreli Anëtare e Këshillit Bashkiak Shkodër 

Tashmë Enti Rregullator i Sektorit të Furnizimit me Ujë dhe Largimit e Përpunimit të Ujërave të Ndotura ka nisur procedurën e ndryshimit tarifor duke e rritur atë për të gjithë banorët e territorit të Bashkisë Shkodër.

Ndonëse Këshilli Bashkiak i Shkodrës votoi kundër propozimit për dyfishimin e rritjes së çmimit, rilindasit vendosin të bëjnë fakt rritjen e çmimit të ujit të pijshëm që do rëndojë më shumë xhepat e çdo familje shkodrane.

Fasadat e premtimet rilindase në fushata elektorale përkthehen në rritje çmimesh, tarifash, taksash mjafton që të mbushin arkat shtetërore e të rrisin korrupsionin e në këtë mënyrë të varfërojnë e të vështirësojnë edhe më shumë jetesën e shqiptarëve.

Tashmë shkodranët do gëzojnë rritjen e çmimit të ujit të pijshëm dhe shumë shpejt kryrbashkiaku do t’ju bëjë një tjetër surprizë….parkingjet me pagesë nëpër rrugët e Shkodrës.

Kjo është Rilindja, ky është Edi Rama, ky është Benet Beci dhe kjo është mënyra se si qeverisin duke bërë fasadë e propagandë e duke detyruar shqiptarët të lënë vëndin e tyre për shkak të korrupsionit dhe vjedhjes që i bëhet parave të tyre përmes taksave dhe tarifave të larta që i rrisin pothuajse çdo vit.

Shkodra do t’i japë përgjigjen e merituar këtyre hajnave që gënjeshtrën e kanë profesion dhe mashtrimin e kanë pjesë të propagandës e fasadës rilindase. Këta nuk dinë të bëjnë shtet por dinë vetëm të pasurohen me korrupsion në emër të ‘bërjes së shtetit’.