Shkodra gati për vitin e ri shkollor/ 107 shkolla hapin dyert më 8 shtator, regjistrimet tregojnë rënie të numrit të nxënësve

Me 8 shtator, në Bashkinë e Shkodrës, viti i ri shkollor do të nisë në 107 institucione arsimore të sistemit publik dhe privat parauniversitar.

Ndërsa kanë mbetur pak ditë nga fillimi i procesit mësimor, të dhënat e deritanishme nga regjistrimet tregojnë një rënie prej rreth 200 nxënësish krahasuar me një vit më parë.

Drejtoresha e Zyrës Vendore të Arsimit në Shkodër, Brisela Kadija, tha se shifrat nuk janë përfundimtare, pasi regjistrimet vijojnë, sidomos për fëmijët që kthehen nga emigracioni.

Kadija thotë se një vëmendje e veçantë i është kushtuar përmirësimit të infrastrukturës shkollore, në bashkëpunim me Bashkinë e Shkodrës.

Sipas drejtueses së ZVA Shkodër, rritja e sigurisë në shkolla, shmangia e përdorimit të celularëve brenda ambienteve mësimore dhe përmirësimi i shërbimeve për nxënësit me aftësi ndryshe janë disa nga sfidat kryesore edhe për vitin e ri shkollor.